Week 17, 25 april 2012

Neturluk wâren eech en ozze Sjang me ’n flêske wiên onder ozzen êrm nao de resepsie gewist van ozze neeje burregemester. Maer vêrder as de deur van de...

Neturluk wâren eech en ozze Sjang me ’n flêske wiên onder ozzen êrm nao de resepsie gewist van ozze neeje burregemester. Maer vêrder as de deur van de zaol van de Borgh van Maores zien willie neet gekomen. Dao stoond mich un rij meensen, dae wilde ne wieëten. En of willie dao maer achter aon wilden sloêten. En dao zeei iemed dae ’t nog goe ânderhalf uur kós duren vurdae willie aen de beurt wâren. Dae kwâmp umdae veul meensen vuls te lang me de burregemester stonnen te zieëveren. En al die veurzitters van al die verieënigingen maer opscheppen over hun club. Asof de burregemester kan onthawwen van wa er op dae momeent allemaol tigge heur gezigt wurt. As zoe’ne veurzitter now allieën maer zou zeggen: ‘Mevrouw de burgemeester, namens de harmonie proficiat. Mijn naam is Johan Vos en als u het niet tegoei doet dan bent u de klos’. Kiek, dae zou ze wel kunnen onthawwen. Eech zeei tiggen ozze Sjang: ‘Ze kunnen mich wa, hiê in Maores. Willie zien eweg!’ Dien van meech hoeft hiê neet as gêkke Sjang ânderhalf eur in de rij te staon. Zoe lang zou ozze Sjang ut óch ne druuëg hawwen. Trouwes, ozze neeje burregemester hâw ’t óch hellemaol gehad, dae zâg eech van vaeres. Ze was van de bieën âf, want ze zaot op ’n barkruk. Erm Marga. Urenlang nao dae gezânik moeten luusteren. Eech vroog mich trouwes âf wurrum dae die resepsie in Maores gehawwen woor en neet in Buul. Willie hêmmen toch ’n hêrstikke moi gröte zaol in De Borgh. Maer ozze Sjang zeei dae de gröte zaol van De Borgh wel bezet zal zien gewist door de ping-pongclub. En durrum kós de commisaris van de Konigin de neeje burregemester van Craonendoonck neet in Buul installeren. In de zaol van ‘De Borgh’ woor geping-pongt. Dao zien in Buul veul verieënigingen die allemaol wel us öit iets organiseren, maer dae gebeurt bekant nöit in ‘De Borgh’. Os hêrremenie EMM hit geweldige ‘Proms’ gehawwen, maer neet in ‘De Borgh’. Dae geenk neet. Durrum gingen ze de grens over nao Bêls. En in ‘De Posthoorn’ van Hamut hêmmen ze de ‘Buulse Proms’ gehawwen. Och ’t slagwerkfestival van de Buulse EMM was neet in ‘De Borgh’ maer in de cinema van Hamut. ’t Consert van Gerard van Maasakkers me de hêrremenie, neet in ‘De Borgh’ maer in Hamut. De kienmiddig van ‘De Zonnebloem’? Neet in ‘De Borgh’ maer op Schöt in ‘De Reinder’. In ‘De Smeltkroes’ van Maores komen allerlei artiesten op ’t podium, in ‘De Borgh’ neet. Unne activiteitenmiddig’ van ‘Hernieuwde levenskracht’ neet in ‘De Borgh’ maer in Dorplein, in ‘De Schakel’. Gebeurt er dan niks in ‘De Borgh’ in Buul zodde ow eigen âf kunnen vraogen. Neturluk wel. Dao lieren bevobbeld jong snotneuzen die pliesie willen wèren hoe ze boeven moeten vangen en parkeerbonnen oêt moeten schriêven. En dao wèren óch nog un paor van die gesubsidieerde kursussen gegèven aen meensen die dae moeten van de sosjale! En toch liekt ’t of dae ’t er altied hêrstikke druk is. Dae kumt umdae de katolieke boond van âw meensen dao veuraon in ‘De Borgh’ wa ze ‘fwajee’ nuumen, un soort van ‘Seniorenhangplek’ gemakt hit. Dao komen veul âw meensen hun eigen ’n bitje door d’n dâg henne hêllepen. Âw vrouwen dreenken dao ’n kumke koffie en burten wa over vreuger of dun er wa van die spêllekes. Âw manskèrels gôn biljarten. En dae is’t zoe’n bitje dao in ‘De Borgh’. En toch zou zoe’n gemenschapshoês as ‘De Borgh’ ’n zinderende tênt moeten zien wo dae de culturele voonken vanâf spatten. ’n Plak in Buul me ’n podium wo dae wa gebeurt. Maer dae is neet. Dae kan neet. De gröte zaol van ‘De Borgh’ hit gen podium, want die zaol is er um te ping-pongen en dan haje gen podium noeëdig. En durrum moeten veul Buulse verieënigingen boeten Buul gaon as ze wa willen organiseren. Maer vur de Buulse ‘Zittingen’ van de carnavalsverieëniging wurt ’n oêtzondering gemakt. Dan wurt er door de meensen van de carnaval ’n podium in elkaor gezet en hoeft er neet te wèren geping-pongt. Dan moet ‘De Borgh’ umzet mâken. Glaozen vol schoêmende euro’s. Ozze neeje burregemester zal ’t zêlf misschien nog ne wieëten, maer vur heur installasie en resepsie was er gen plak in Buul. In Maores wel. Al moesten de meensen dao wel vuls te lang in de rij staon, zonder dae ter unne stoeël woor aongebooien. Achterâf was ’t maer goe dae wij bie die resepsie umgedraaid wâren. Toen ozze Sjang de flês wiên thoês oêtpakde, die eigenlijk vur ozze neeje burregemester bedoeld was plêkde ’t stikkerke van de see-doêzend nog op de flês. ‘Een plus één gratis!’

’t Is ongepermeteerd!

Junt

junt@chello.nl

Week 13, 28 maart 2012

’t Duurt now ne lang mier en dan is ’t zoe vêr. Dan hêmmen willie hie in Buul unne neeje burregemester. Marga Vermue-Vermue. Hoe zal ze wèren binnenge...

’t Duurt now ne lang mier en dan is ’t zoe vêr. Dan hêmmen willie hie in Buul unne neeje burregemester. Marga Vermue-Vermue. Hoe zal ze wèren binnengehaeld? Mestal gebeurt dae op ’n biezonder manier. Eech wieët nog dae ze burregemester Boudrie in ’n open perdekoets ophaelde bie de Ao-brug as dae ge nao Zurrik got. Me de hêrmenie vur op geenk de koets me veer pèèrd en de burregemester nao ’t törp. Burregemester Krijgsman woor me ‘n vliegtuig binnengevlogen. Now bin eech us beneejt hoe dae ze de neeje burregemester in Buul binnen zullen haolen. Ozze Sjang deenkt dae er ’n peleton renners van de Lukkiesprinters heur in Borsele ophaelt, zoe dae ze op hurre renfiets, op de kop van ’t peleton, nao Buul kan fietsen. De Lukkiesprinters moeten heur dan ums de beurt unne kilomèter dowwen, ânders haelt ze dae neturluk neet. Vur heur zêlf wurt ’t óch allemaol spannend. Ze is per slot van rèkening nog nöit van ze lèven burregemester gewist. Zou ze toch wel wieëten hoe dae dae moet? Burregemester zien is gen minnigheid en zeker neet um burregemester van Buul te zien. Hoe zou dae gaon as ze op hurre urste werkdâg in hur kantoer kumt. Dao zal neturluk nog niks op hurre buro liggen. Maer as ze de laoien open trekt, dan zal ze er âchter komen in wa vur ’n sirrekus ze teraecht gekomen is. Dan ligt dao zoe’n aonkoeëpakte van de gebouwen op ‘Cranendonck 3 en 4’. Twieje âw gebouwen die de gementeraod van van Ganzeweenkel vur bekant twieje en ’n hâlf miljoen gekôcht hit. Onder die akte ligt ’t plan um diezêlfde twieje âw gebouwen op ‘Cranendonck 3 en 4’ wer te verkoeëpen aen dienzêlfde van Ganzeweenkel. Eech deenk dae Marga dan vur de urste kier Petterik Berten efkes zal bêllen um heur iets oêt te komen leggen. Och zal ze er dan âchter komen dae die koekebakkers van de raod er serieus over gedâcht hêmmen um ’t gementehoês âf te brèken um er wer ’n ânder vur in de plak te zetten. As ze dan efkes van ’t lachen bekomen is zal ze Petterik wel vur d’n twedde kier bellen. En dan zal ze hum vraogen hoe lang dae de gementeraod van Buul ’t Noorden al volledig kwiêt is. Ze zal Petterik Berten vraogen of ze in Buul wel wieëten wa kultuur is. Ich deenk dae die van de gementeraod nog gen ens wieëten hoe kultuur geschreven moet wèren. Wa bin eech blij dae ozze burregemester ’n vrommes is! Zou ze óch ’n soort receptie gôn hawwen, zoe dae de meensen heur ’n hând kunnen gôn gèven? Eech en ozze Sjang gôn dao dan hieël zeker henne. En as eech heur dan ’n hând gêf dan zal eech zeggen: ‘Mevrouw de burregemeester, ik ben Junt en dit hier neffe mij is onze Sjang, mijne mens zo gezegd’. En dan zal zi neturluk zeggen: ‘Prettig met u kennis te maken’. Now hoop ich maer dae ze dae lang ‘prettig’ zal bliêven vinnen, maer dao bin eech neet zeker van. Wa eech mich óch âf vraog is of ze ’t er mej ens is dae die ambtenaren van de gement allieën nog maer informasie gèven aen meensen die unne kompjoêter hêmmen staon. Haaje gillie dae óch gelèzen in de Grenskoerier? Die van de gement informeren ós tiggeworig ‘digitaal’. In de Grenskoerier stoond ‘Uw gemeente werkt steeds meer digitaal met nieuwe iPad app RaadDigitaal’. En efkes vêrder stoond ‘Bent u nieuwsgierig geworden? Download de app gratis via de QR code of kijk op www.simgroep.nl/raaddigitaal.’ Asjeblief! Dae stoond er. En wa moeten willie dao mej? Hoe komen willie, awwer meensen, aen ós informasie? Of tellen willie nemmer mej? Maer eech snap dae wel. Dao zien neturluk un paor van die ambtenaren die ’n bitje intressânt over willen komen, die zoegenaamd modêrn willen zien, die de blits willen mâken. En durrum komen ze me van dien flauwekul aon die allieën jong meensen kunnen snappen. Maer dae wil nog ne zeggen dae eech neet modêrn bin. Eech en ozze Sjang stön kerdju nog midden in ’t lèven. Zoe hêmmen willie óch unnen helle modêrne tillevizie wo bie ge nemmer op hoeft te staon um dien harder of zachter te zetten. Dae kunnen willie me zoe’n modêrn apperaatje me knöpkes. En willie hêmmen óch vort unne doesj me ’n mengkraon wo dae waerm en kâwd waoter tegeliêkertiêd oet kumt. En eech kook geregeld modêrn boêtelands èten zoe as spaggettie of makronie. En dao hêmmen willie gennen app vur de ipad vur noeëdig. Maer ze zullen bie de gement wel ’n schriêffout gemakt hêmmen. Bie ’t woord ‘app’ zal de urste p wel ’n a moeten zien.

’t Is ongepermeteerd!

Junt

junt@chello.nl

Week 09, 29 februari 2012

Haaje gillie ’t óch gezeen? Veurige wêk in de Grenskoerier? De foto van ozze neeje burregemester? ’t Is ’n vrouw! Krêk wa dae eech alzelève al wou. No...

Haaje gillie ’t óch gezeen? Veurige wêk in de Grenskoerier? De foto van ozze neeje burregemester? ’t Is ’n vrouw! Krêk wa dae eech alzelève al wou. Now gôn we ’t mej mâken. Alles zal goe komen in Buul, let maer op! Ozze Sjang lest de Grenskoerier altiêd op ’t huuske. ‘Dae is de ieënige plak in ós hoês wo dae eech kan lèzen zonder dae gee er ow eigen me bemoeit,’ zigt ozze Sjang altiêd. En me dien Grenskoerier van veurige wêk, me die foto van ozze neeje burregemester, hit ozze Sjang wel bekant ’n hallef eur op de plee gezèten. Ozze Sjang kós er schienbaar gen genóg van kriêgen. Now moet eech zeggen dae volleges die foto de neeje burregemester ’n proonte vrouw is. ’t Hâw koijer gekunt zal eech maer zeggen. Wa neturluk óch hieël belangriêk is, is dae ze van ’t CDA is. Gen ‘hokkiehuppelkeuntje’ van de VVD, gen communisties, geitenwollenzokkentiep van de PvdA. Niks van al dae boêten Buuls geduj. Gewoon CDA. Misschien is ze zêlfs wel Rooms Katholiek! Maer laoten we ne flauw zien. As dae ze protestand is of zoe iets dergeluks dan moeten willie dao óch tevreejen me kunnen zien. Ze kumt oet Zeeland en ze hét Marga Vermue-Vermue. Toen eech die nâm zag staon dâcht eech urst aen inteeld in ’n klein Zeeuws gehugje. Maer dae zal wel neet waor zien, want dae is krêk utzêlfde as hiê bie ós in Buul Lamers-Lamers. Hur grötste hobby is wielrennen. Dae stoond óch in de Grenskoerier. Ze wet dus wa afzeen is. En doorzetten en gen gemaauw van ‘Is ’t nog wiêt?’ ’t Is er zoe ieën van d’r op, d’r aon en d’r over henne. Zou ze unne schêrpe spreent in de bieën hêmmen of zou ze goe kunnen klimmen? Aen de foto te zeen is ze op hurre renfiets ’t bêste as ’t règent, haord waait en op unne kleenkerweg die ’n bitje bêrg op get. Over un paor wèken zullen we heur wel achter Tom van d’n Tuuëm oet de Broekkânt zien fietsen of me Seel Bennebroek of Jo van Zeggelen. Dan zal ze hur kuûten fleenk in moeten smeren. In de Grenskoerier stoond óch dae de neeje burregemester op carnavalsdeenzig al in Buul aen ’t roond kiêken was. Ze hawt van carnaval stoond er biê. Ze was ‘In cognito’ stoond geschreven. Goe van heur dae ze zich óch verkleejd hâw. ’t Hoeft van meech neet altiêd in unne boerenkiel te zien. Unne moie cognito kan óch goe staon me carnaval. Marga stoond er van te kiêken dae er in Buul zoe veul van die gröte weenkels wâren zoeas unne Hema en Blökker. ‘Die hebben ze in Borsele niet,’ hâw ze gezigd. Maer in Borsele hêmmen ze óch genne Liplijn en óch gen Töntje Broeëd en óch gennen Atep. In Borsele hêmmen ze wél ’n kerncentrale en die hêmmen willie dan hie in Buul wer ne. Willie kunnen óch ne alles hêmmen. Willie hêmmen hiê bie ós in Buul wél drei meulens en un vleegveld. Dae bedoel eech maer! In de Grenskoerier stoond óch allemol opgenuumd in wa vur commissies en besturen en organisaties mevrouw Vermue-Vermue zit. Toen eech dao zoe us overhenne lesde dâcht eech wel: Wa bemoeit dae vrommes zich toch me veul dingen. Zou die nog öit unnen aovund toês zien? Zou ze saovus eigeluk wel toês willen zien? Ze is getrowd me unne boer, dae stoond wél in de Grenskoerier. Dae bin eech óch, dus eech wieët wo over dae eech ’t hêb. Maer as eech us unne kier niks te doeën hêb dan goj eech er neet op unne renfiets van tussenoêt! Dan bliêf eech bie ozze Sjang. Dan hâw eech hum aen de gang. Ozze Sjang is goe in âfwassen, stofzuigen, bed opmâken en de plaen keren. Allieën moet eech hum hêllepen um er aon te deenken dae hij dae moet doeën. Op dae gebied wurd ozze Sjang ’n bitje vergètaatig. Wije wo dae eech nog ’t meste neejschirrig nao bin? Nao wa ozze neeje burregemester get doeën me ós gementehoês! Haaje gillie, edelachtbare dames en heren van de gementeraod in Buul, dae óch gelèzen? In Borsele hêmmen ze hun gementehoês neet âfgebroken, maer moi opgeknapt! Eech bin blij dae de neeje burregemester ’n vrommes is en genne manskèrel. Vröllie deenken urst goe nao vur dae ze wa zeggen. Vröllie kunnen óch bèter me gêld umgaon. Zeker Zeeuwse vrouwen, want die zien zuûnig zeggen ze altiêd. Eech bin blij me ozze neeje burregemester en ozze Sjang óch. Toen eech hum vroog wurrum dae hij blij was me ozze neeje burregemester zeei ozze Sjang: ‘Niks zoe moi as dae er hiê, door de straoten van Buul, ‘n Zeeuws meisje as burregemester op unne renfiets vurbiê kumt.’
’t Is ongepermeteerd!

Junt

junt@chello.nl

Week 04, 25 januari 2012

Wo dae ich mich de lêste tiêd steeds mier over begin op te juunen is dae ‘t net is of dae er steeds mier meensen zien die zich ânders, en nog êrger, b...

Wo dae ich mich de lêste tiêd steeds mier over begin op te juunen is dae ‘t net is of dae er steeds mier meensen zien die zich ânders, en nog êrger, bèter veurduun as dae ze zien. En dae duun ne allieën meensen oet Maores, maer óch hiê oet Buul. Vreuger hadde in iedere gröte weenkel of op un bânk unne baes. Of unne bedrijfsleider. Tiggeworig nuumen die meensen zich mennezjer. Dae kleenkt belangrijker. En die mennezjers zien neet bezig me van alles te regelen maer die ‘mennezjen’. Dae’s krêk ’t zêlfde as regelen maer ’t kleenkt wa intressânter. Dao zien veul meensen die ’r van alles aon duun um toch vural maer belangrijk en vurnâm te liêken. Op verjaordagsfesjes voeren die altied de gröte bakkes en scheppen ze op over wa ’n geweldig belangrijke baon zillie hêmmen. Hiê bie ós in Buul nuumen we dae zwaetsers. Die willen zich óch altied jonger veur doeën as dae ze zien. Dae duun zillie um indruk te mâken bie vröllie die vur hun te joonk zien, maer dae snappen die zwaetsers zêlf neet. Dae vrouwvolk hit zoe’nen âwe snoeper neturluk mej in de gaoten. Dao zien ’t vröllie veur. Zêlf kriêg ich altied un bitje meijeliejen me die meensen. Dan zit dao op zoe’n fesje zoe’nen âwe mennezjer, me griês haor of al tâmeluk kaol op ziene kop. En die hêmmen hun âw bieën vol me spataoren, gestoken in ’n vuls te strakke spijkerbóks. Nog belachelukker is ’t dae die kèrels dan óch nog unne vuurroie trui aon hêmmen wo dae ’t duur mêrk me gröte letters op stet. En dao stet dan neet ‘Zeeman’ op, maer un tèkening van unne krokodil en dao stet dan zoe iets bie van “wa costa”. En zoe deenken die belègen figuren nog indruk te mâken op die vuls te jong vrouwen. Kiek, en dao kan ich mich dan over opjuunen. Eech kan ’t dan óch ne laoten um as zoe’nen aonsteller te deecht tigge zoe’n vuls te joonk vrouwke begint aon te schurreken, um dan te vraogen hoeveul jaor zien awste kleinkiendje is. Me zoe’n vraog zien ze mestal ne blij. Dao zien óch veul meensen die belangrijk liêken door wa ze aon hêmmen. Unne pliesie bevobbeld moet ’n pliesiepak aon me unne bókseriem wo zoe wa van dae marteltuug en ’n moordwapen aon hangt. Dan zien ze er belangrijk oêt. Advokaoten en rêchters duun unne lange zwêrte mantel um me ’n wit befje. Wurrum eigenluk? Wurrum ne gewoon klier? Unne rêchter hoeft van meech echt neet in ’n tiesjurt en ’n korte bóks achter zien toffel te gôn zitten. Maer ’n fesoenluk schon pak zou toch óch goe zien? Maer dao get ’t neturluk neet um. Ze moeten indruk mâken! Ze moeten belangrijk liêken. Zillie willen ‘de kleine man’ onzeker mâken en dao hêmmen ze die vermomming vur noeëdig. Unne rêchter of unnen advokaot zal neet toes me ziene keep um ’t graos van zien gezon gôn maaien. Zien wit befje zou dan lelluk in de weej hangen. De burregemester van Buul wil indruk mâken door ’n gröte ketting um ziene nêk te hangen. As eech dae zeej dan wèr eech dao altied un bitje lacherig van. Eech bedoel dae unne burregemester toch unne volwassen manskèrel of vrouw is. We hêmmen now efkes genne burregemester en durrum mag Petterik Berten sòms die ketting um ziene nêk drâgen. En dae duut hij. Me zien vol verstând en dao schamt ie zich niks veur. Petterik is loko-burgemester. Petterik is belangrijk. Dus, ketting um zoedae iederieën dae kan zeen. Zou hij in de spegel kiêken as hij die umduut? Of de ketting wel rêcht hangt me de medallie in ’t midden? Tiggewoorig zien er óch veul meensen die mènen dae ze zich bèter veur doeën door Engels te gôn praoten. Óch weenkels duun dao aen mej. Kiekt maer us in’t törp. ‘Sale’ hangt er me gröte letters vur de raomen. Marcel Bennebroek zigt dae ge dae oêt moet sprèken as ‘Seel’ en die kan dae wieëten. Maer wurrum ne gewoon ‘Opruiming’. Wa is dao verkiert aon? As ge tiggewoorig êrreges in ’n café ’n tas koffie gôt dreenken en ge moet efkes nao de weesee dan zieje dao twieë deuren. Op de ieën stet ’Man’ en op de ander ‘Lady’. Dan vraog eech mich âf wurrum dae ze op de deur van de manskèrelsweesee dae gewoon in ’t Nederlands zetten en op de deur van de vrouwenweesee in ’t Engels. Terwiele ut gewoon un huuske is. Eech begin ’t pas êrg te vinnen as dae meensen ‘de kits’ zeggen as ’t over hun jong get.’Wij hebben ontsetttend leuke kits’. Wanne kwats! Kits is wa ozze Sjang bie ós âchter in de heg gespeejd hâw, toen hij nao ’n stevig fest nog unne zoere hèring me hâgelslag en pikkelillie nao binnen werkde. Meensen die zich belangrijker veur doeën as ze zien nuumen willie hiê in Buul ‘zeikers’. Ozze Sjang zigt: “Dae zien meensen um op te kitsen!”

’t Is ongepermeteerd!

Junt

junt@chello.nl

Week 51, 21 december 2011

Lêst vroog ieën van die vröllie van de Grenskoerier aen meech of dae eech mien stukske neet op de lêste woenzig van de mónd, maer ’n wèk ierder, in de...

Lêst vroog ieën van die vröllie van de Grenskoerier aen meech of dae eech mien stukske neet op de lêste woenzig van de mónd, maer ’n wèk ierder, in de Kerst-Grenskoerier wou schriêven. En ze zeei er óch nog biê dae ‘t ’n positief stukske moes zien. Un positief stukske! En dae vraogen ze aen meech! Dao hêb eech lang, hieël lang over nao moeten deenken. Eech hêb ’t er zêlfs me ozze Sjang over gehad. Eech vroog ‘m of dae hij misschien iets positiefs wis te vertellen. En dao moes hij óch hieël deep over naodeenken. Maer inens zeei hij: ‘Willie zien er nog’. En dao hâw ozze Sjang gelieêk in. Dae was zoe positief as ’t maer zien kan. Vur de rêst valt ’t allemaol ne mej. Teminste as we de krânten, de radio en de tillevisie moeten geluuëven. ’t Is kriezis! Willie moeten inleveren. Willie moeten zuunig aon gôn doeën. En we moeten vural mier gôn betaolen vur alles wa willie noeëdig hêmmen. Maer eech geluuëf ne zoe in unne kriezis. Die wurt ós dór de krânten, de radio en de tillevizie maer aongepröt. ’t Is hellemaol genne kriezis. Wurrum eech dae deenk? Zal eech vertellen. Stel dae nimmed hie in Buul unne krânt zou lèzen, dae er gennen enne krânt Buul binnen zou komen. Stel dae er in Buul genne radio te beluusteren veel en er nao genne enne tillevizie gekeken kós wèren. Hoe zouwen willie dan moeten wieëten dae ’t kriezis is? Wo aon zouwen willie dae dan moeten mêrken? De weenkels hêmmen nog nöit zoe vol gelègen. De meensen hêmmen in dizze tiêd aen zês dâg ne genóg um hun bódschappen te doeën. Dao moet óch sónnigs nao de weenkels gegaon kunnen wèren. De meensen sjouwen me kerstpakketten die ze êmper kunnen drâgen. De kêrstbuuëm hêmmen nog nöit zoe protserig volgehangen as dit jaor. En wije wa unne kêrstboeëm tiggeworig kôst? Eech hêb huren zeggen dae er buuëm zien die wel viêf en twintig euro’s kôsten en soms zêlfs wel mier! ‘Maer dae is wél ‘me kluit’ zeggen ze er dan biê. En mende dan dae er minder kêrstbuuëm verkôcht wèren? Zie je gêk! En wa dachde van die kêrstverlichting overal? En ne allieën binnen. Och boêten zieje vórt overal lêmpkes brannen. ’t Is kriezis, overal kriezis. Now, eech geluuf er niks van, helemaol niks! Willie wèren vur de gek gehawwen. Willie, de gewoon meensen oet de straot, wij wèren bedrogen dór de ‘grote meneren’ me van die platte tiepmesjientjes onder hunne êrm en sónnigse pêkskes aon. Van die snêl gesneejen ventjes me brilkrèm in hun haor. De deftige meneren die neet werken maer me ós gespaord gêld hoeëg rentes willen vangen en dan de patser oêt gôn hangen. Vreuger wisde dae ów centen op de spaorbânk veilig wâren. Maer dae is al lang ne mier. In de moiste en grötste gebouwen op ’n dörp of in un stad zaoten de heren van ’t bestuur en de direkteur de gröte jongens oêt te hangen, en dae me ós gêld! En as ze ’t werkeluk al te gêk makden dan kósten ze vertrekken. Maer wel me ’n paor extra miljoenen in hun tês. Kriezis, löt mich ne lachen. Dao wurt ’n spêl me ós gespuld um ós nog mier gêld oet ós tês te kloppen. Un komplot van bânken en regering. Zoewe, dae vin eech dus. En now maer wer gâw iets positiefs opschriêven want ânders zulde die mutsen van de Grenskoerier us huren. Wije wa positief is? Willie kriêgen in Buul unne neeje burregemester. Eech hoop dae ’t un vrommes is, dae zou nog veul positiever zien. Vröllie kunnen bèter me gêld umgaon. Die deenken urst nao! Dae is nog veul positiever. Dae gôn de politiekers van ELAN, CDA en VVD now óch doeën. Naodeenken en naotellen! En dan gôn ze bedeenken hoe dae ze ós kunnen vertellen dae ze toch maer besloten hêmmen um ’t gementehoês te laoten staon. En, let op, dan zeggen ze dae ze dae zêlf bedâcht hêmmen. Maer willie wieëten neturluk dae dae ne waor is. Dae hit Miel Verwaajen bedâcht. ’t Is maer goe daeter ’n neej jaor aon zit te komen. Eech hoop dae gillie er allemaol ‘n goei en schon jaor van kunt mâken. Blieft gezoond en gelöft die criminelen neet die ós unne kriezis aen praoten um er zêlf bèter van te wèren. En bedeenkt dae as ge echt hónger haet unne gehaktbal èven lêkker smakt as unne biefstuk. Kriezis of neet, ozze Sjang blieft miene Sjang, ‘met kluit’!
’t Is ongepermeteerd!

Junt

junt@chello.nl

Week 48, 30 november 2011

Eech wil óch un kerstpakket! Un groeët, wo dae veul in zit. Hieël veul! Unne helleboel meensen kriêgen tussen Sinterklös en kêrsemis un kerstpakket, m...

Eech wil óch un kerstpakket! Un groeët, wo dae veul in zit. Hieël veul! Unne helleboel meensen kriêgen tussen Sinterklös en kêrsemis un kerstpakket, maer eech hêb dae nog nöit ieën gehad. En ozze Sjang óch neet. En dae moet maer us verânderen, want zoe as ’t now get is ne erluk. Veurbeld? Dae kunde kriêgen.
Vat now maer us alle meensen die bie de gement werken of bèter gezigd die dao op de loeënliest stön. Die kriêgen allemaol ’n kerstpakket. En dae wurt betaeld van ós belâstingcênten. Dae vin eech neet erluk. Dan moeten ze aen alle hoêshawwes in Buul óch ’n kerstpakket gèven. Wurrum bevobbeld kriegt unne ambtenaar die dik betaeld wurt wél ’n kerstpakket en ’n allieënstönd biestândsmoederke me drei klen kiendjes neet? Dae zou eech wel us willen wieëten. De wethawwers en de burregemester zullen dizze kier wel veul dikke kerstpakketten kriêgen. Van sloopbedriêven en bouwbedriêven. Eech kriêg niks. Eech moet alles zêlf gôn koeëpen. Now wurt ’t tiggeworig wel hênnig gemakt um oêt te kiezen wa dae ge vur kêrsemis wilt gôn koeëpen. Dao vallen um de paor dâg pakken folders binnen die vol stön me moi kleurenfoto’s me van van alles wa ge kunt koeëpen. Veurige wèk veel er unne plestieke buul op ós deurmat wo dae negenentwintig folders en bukskes in zaoten. Jao, eech hâw ze naogeteld! En as ge dan kiekt wa dae er tiggeworig allemaol te koeëp is! As ge dae weelt kunde un ‘digitaal weerstation’ koeëpen. Gröte onzin neturluk, want op de radio vertellen ze um ’t half uur wa vur wèr ’t wurt en ’t stet óch in de krant. Ge kunt óch un ‘draadloos baardtrimset’ koeëpen. En dae zou dan iets biezonders moeten zien. Ozze Sjang schèrt zien eigen altiêd draadloos, al zoelang as dae eech hum kin. Of mende dae ozze Sjang ’n snoer aon ziene schèrkwâst hit hangen? Eech hêb us goe in die bukskes gekeken, want dae is eigeluk weenkelen van oet owwe luie stoeël zonder dae ge gêld oêt geft. En wa meech opveel is dae ge, van al wa in die bukskes stet, negenenniggetig present neet noeëdig haet. Eech lêf al hieël lang zonder unne ‘Tablet Mania’ en dae bevilt mich goe. Eech zou trouwes óch ne wieëten wa dae vur ’n ding is. Now hâw eech in al die negenentwintig folderkes us goe gezôcht nao ’n schön kedootje vur ozze Sjang. Jao, want sóms wil eech ’t smeulend vurke wa er tussen ós gluit nog wel us wa op poéreken al vilt dae tiggeworig kerdju ne mej! Eech hâw gedâcht aen un schön neej piêp vur ozze Sjang me unne echte lèren tabakszak. Maer mende now dae êrreges in ieën van die negenentwintig folderkes ’n piêp of unne tabakszak stoond? Ge kunt wel ‘n ‘Adidas Dynamic Pulse cadeauset’ koeëpen maer dao zit ozze Sjang mich al mej aon komen. Veul livver zou hij ’n paor neej kleûmp hêmmen maer die stön er óch ne biê. Wa eech wel in ieën van die folders tegenkwâmp was ’n döske me, let op, ‘vochtig toiletpapier’. En dan kunde nog kiêzen tussen ‘Vitamine E, Sensitive, Hygienic of Kamille’. Wie dae oêt gevonnen hit moet ’t toch wel hieël dun door zien bóks geloeëpen hêmmen! Eech ziej ozze Sjang al bezig op ’t huuske me zien ‘Vochtig Toiletpapier’. Hit ie dao naoderhând óch nog us unne handdook bie noeëdig. En ’t duurt now al zoe lang. Nieje, laot eech al die bukskes maer dao wo ze toês huren, bie ’t âwd pepeer. Ut ieënige kerstpakket wo eech ozze Sjang blij mej zou kunnen mâken zou ‘n moi kertonnen döske zien me drei flessen zjenèver er in. Maer eech en ozze Sjang moeten ’n bitje op ós cênten gôn letten, want ’t is kriezis. Dae zeggen ze iedere dâg op de tillevizie en dae stet in alle krânten. Willie moeten zuunig aon gôn doeën zeggen ze. De leugenaars! Dao is hellemol niks van aon. Gôt maer us in de weenkels kiêken. Die hêmmen nog nöit zoe vol gelègen me totaol onnoeëdige flauwekul-spullen. Gôt maer us in dien tuinweenkel van Steenbakkers kiêken, dan kunde zeen wa dae er allemaol weggegoit werd aen nog goei spul. Ze moeten oêtbreijen want ’t kan er nemmer in! Alles wa dae er over de rând van de welvaart valt sjouwen de meensen dao henne. Kriezis, schei toch oêt, hâwt er toch over op. Zoelang willie ós iedere dâg vol en vet èten en gêld oêt gèven um de kilo’s wer kwiêt te râken moeten we ozze moond hawwen. We komen niks te kort. Eech teminste neet. Behalve dan ’n kerstpakket van de gement, want dae kriêg eech neet.
’t Is ongepermeteerd!

Junt

junt@chello.nl

Week 43, 26 oktober 2011

’t Get dus toch gebeuren. Bekant nimmed in hieël Buul hit dae vur meugeluk gehawwen. Dao zien dingen in ’t lèven wo van ge zegt: ‘Dae duuje neet’. Mae...

’t Get dus toch gebeuren. Bekant nimmed in hieël Buul hit dae vur meugeluk gehawwen. Dao zien dingen in ’t lèven wo van ge zegt: ‘Dae duuje neet’. Maer ’t gebeurt wel. Os gementehoês wurt âfgebroken. ’n Uniek gebouw, zoe as er nêrreges in hieël Nederland ieën stet, wurt gesloopt. En dae is de scheuld van Petterik Berten en zien politieke partij ‘ELAN’. En dae is óch de scheuld van Frans Strik me zien Christelijke politieke club CDA. En dae is óch de scheuld van burregemester Meinema. Dien VVD-wethawwer oet Maores kunde niks kwaluk nemen, want dien hit toch niks in te bringen. Vrogt aen iedere Buullander wa dien er van vindt dae ze ut gementehoês af willen brèken, dan zal dien zeggen dae ze bie de gement hêrstikke gêk geworen zien. ’t Is dan toch óch werkeluk ne te geluuëven wa dae er gebeurt. Eech bedoel, zoeveul mois hit Buul neet. Willie hêmmen ’n schon kerk, willie hêmmen ’n moi âwd Schepenhoês en er stet in Buul ’n hieël moi prottestâns kerkske. En dan hêmmen willie dus óch nog ós gementehoês. ’n Hieël moi gebouw ‘met architectonische kenmerken uit de Bossche School’. En dae gôn ze now dus âfbrèken. Eech snap dao hellemol niks van. Hoe kunnen ze dae toch doeën? Hoe durven ze? Eech bedoel wa moet er um gaon in unne kop um zoe iets te bedeenken? Wa is er me die meensen gebeurd dae ze tot zoe iets in staot zien? Now is ’t neturluk neet zoewe dae álle rödsleej ’t gementehoês um willen dowen. Dao zien óch rödsleej die hun verstând gebruuken. Vat bevobbeld maer us die club van Hanneke Balk oet Zurrik. Die zeggen neet dae ’t gementehoês kôste wa’t kôst moet bliêven staon, maer die willen wel urst wieëten wo dae ze ’t over hêmmen. Die willen door meensen die dao verstând van hêmmen urst laoten onderzeuken hoe ‘uniek’ dae gebouw is en wurrum. Die willen urst wel us wieëten wa dae ‘de Bosssche stijl’ inhawt. En pas as ze dae wieëten willen ze zeggen wa dae zillie vinnen wa dae er me ’t gementehoês moet gebeuren. Kiek dae is naodeenken vur dae ge iets duut. Petterik Berten en zien ELAN-partij die hêmmen dae allemaol ne noeëdig. Cor van der Kâmp wet neturluk alles van ‘De Bossche School’. Niemed hoeft Cor te vertellen wa de historiese waarde van ós gementehoês is. Van de club ELAN is Nadien Roijmans de ieënige gewist die neet gestimd hit vur afbraak. Dao zal ze van Petterik Berten óch wel fleenk vur op hur kloeëten gehad hêmmen. Dae die van ’t CDA niks um ós gementehoês gèven dae snap eech wel. In ’t CDA zit gen ‘Buulgevuul’. Frans Strik, de CDA-wethawwer is unnen overgewaaide pliesie die in Zurrik is gôn wonen. Frans Kuppes is er eigeluk gewoon enne van Schöt. En dao kumt Anita Duusters óch vandaon. En as eech ullie dan óch nog vertel dae Ad van der Weide er enne van Maores is, dan hoef ich hiê vêrder niks mier te zeggen. Aen hieël dae CDA zit niks Buuls aon. Wa gèven die um ós gementehoês! En van de VVD hoêven willie hiê in Buul al hellemaol niks te verwâchten. Neet allieën hunne wethawwer maer óch hun rödslid Sjaak d’n Breeje kumt oet Maores. En dan hêmmen zillie Walkate nog, dus dan wije ’t wel. Frits van der Wiel van de PvdA hit óch nog gevrogd of dae ELAN, het CDA en de VVD nog us efkes nao wilde deenken of dae zillie ’t gementehoês wel um moeten laoten dowwen. Maer niks hit gehollepen. Now is naodeenken neturluk óch neet ’t stêrkste peunt van ozze burregemester en zien wethawwers, ânders zouwen zillie dae wel efkes gedaon hêmmen. Gelukkig zien er in Buul nogal wa meensen die dit allemaol ne zoe maer laoten gebeuren. En geliêk hêmmen ze! Iederieën die dae wil kan zien mèning gèven over wa de gement van plan is me ós gementehoês. En now wil eech hie aen iederieën, die dit stukske lest, vraogen um óch gebruuk te mâken van die meugelukheid. Geft ow mèning! Löt van uch huren! Maer ge moet óch laoten wieëten as dae ge ’t ens ziet me die slopers. Willie moeten allemaol ós eigen erlukke mèning gèven. Veur of tegen! En as dae gebeurd is zullen ós gekozen vertegenwoordigers bie de gement toch zeker wel nao ós luusteren. En as ze dae neet duun dan zullen ze de rèkening gepresenteerd kriêgen. Bie de volgende verkiezingen. En deenkt neet Petterik Berten dae willie dae tiggen dien tiêd vergèten zullen zien. Hieël zeker neet!! Dao zörg eech dan wel veur. Eech zal ’n wèk vur de gementerödsverkiezingen hiê in dizze Grenskoerier schriêven wiens scheuld ut is dae ós gementehoês is afgebroken. Nâm vur nâm! Petterik Berten me zien ELAN, Frans Strik me zien CDA en dien wethawwer oet Maores me ziene VVD zullen dan me hoofdletters en vetgedrukt te lèzen zien as de persoeënen die ós ‘monument in wording’ hêmmen vernietigd. Maer zoe vêr zal ’t wel ne komen. De twedde letter van ’t CDA stet er toch zeker ne vur niks? Petterik Berten zal me zien gezoond Buuls verstând zien eigen ELAN toch ne um zieëp gôn hêlpen? Ozze Sjang zeei tigge meech: ‘Junt, as ze now vur dae ze ’t gementehoês gôn slopen er urst de Meus ’n kleurenfoto van laoten mâken en die zoe groeët as unne pooster in de Borgh hangen, dan kan iederieën dao iedere dâg nao gôn kiêken. Toen ich ozze Sjang dae huurde zeggen hêb ich mej nao Mariënburght gebêld of er nog plak was. Op de gesloëten âfdieëling!
’t Is ongepermeteerd!

Junt

junt@chello.nl